مناقيش الجبنه والزعتر

إخوتي وأخواتي اعضاء المنتدى

بقدم لكم مناقيش الزعتر والجبنه

وللامانه عجبتني في أحد المنتديات وقلت انقلها لكم

وإن شاء الله بعملها وعازمتكم عليها

حياكم الله

لعجينة


2 1\\2 كوب دقيق منخول
ملعقة كبيرة خميرة
ملعقة كبيرة ملح
ملعقتين كبار سكر
3 ملاعق كبار حليب مجفف
ملعقة كبيرة سمن كريسكو
كوب ماء دافئ

الحشوات

- زعتر مخلوط بزيت زيتون
كل منقوشة بدها تقريبا ملعقة زعتر كبيرة واخلطيها مع الزيت
بحيث انها تكون متماسكة مو زيت كتير

- جبنة وانا استعملت الجبنة النابلسية بحبة البركة والجبنة بتكون طرية
وما فيها ملح كتير لانو النابلسية ازا كانت قاسية بكون فيها ملح كتير لازم تنقعيها
من الليل والصبح تغليها لو باقي فيها ملح ولو ما في نابلسية ممكن تستعملي
جبنة العكاوي وافضلها كانت العكاوي استرا
- بيض وملح وفلفل

الطريقة
انا عملت ضعف كمية العجين يعني 5 اكواب دقيق
بنذوب الخميرة مع ملعقة سكر وكاسة ماء دافئ
نضيف السمن ونحرك وبعدين نضيف الدقيق والملح وباقي السكر والحيلب المجفف
ونعجن حتى تتكون عجينة متماسكة لا تلصق باليد
ملاحظة لا تضيفي الماء الا بعد ما تعجني وتشوفي
كم بتحتاج ماي بعد

نغطي العجين ونتركها حتى تتخمر وتحتاج ساعة او اكثر حسب الجو
ونعمل الحشوات

الجبنة بس حطيها بايدك كانك بتعصريها ونزلي منها كل الماي اللي فيها
وهيك بتكون انهرست وما في داعي للبرش


والزعتر زي ما حكيت حطيه مع الزيت بس لا تكتري زيت خليه متماسك بهالشكل
http://www.raff3.com/uploads/picture/09703cf7aa.jpg

بناخد العجين بنقسمها نصين كل نص بنقسموا خمس اقسام>>>درس رياضيات على غفلة
يعني بصير المجموع عشر قطع عجين بنكورها وبنفردها بهالشكل


وبعدين بنساوي اطرافها زي هيك عشان نحط الحشوة

بننقلها عصينية الخبز وبنحط عليها الحشوة وهاي الزعتر

وحشوة الجبنة اول بندهن العجين بنقطة زيت زيتون
وبعدين بنحط الجبنة وبنفردها

بالنسبة للعجين اللي بالبيض لازم تنتبهي لنقاط مهمة والا الدنيا بتحوس عليكي:

اول شي حواف العجين لازم تكون عالية يعني خلي العجين كانها حفرة وحواليها
سور الصين العظيم والا بعدين بيتسرب البيض وبيعمل حوسة جواة الصينية
تاني شي لما تيجي تحطي الصينية بالفرن خليها مستقيمة زي ما هي اوعي تميليها
بينزل البيض من مكانو وبتدعي علي >>>اوعوا حدا يدعي علي
وكمان خزقي العجين من جوا بواسطة شوكة حتى ما ينفخ العجين من مكان
وينزل البيض >>>يا دي البيض اللي جننتينا فيه
لا صدقوني الموضوع سهل والنتيجة روعة بس بدها شوي تديري بالك

شوفي هون كيف الحواف عالية
افقسي البيض بشويش حتى ينزل الصفار بكامل قواه العقلية قصدي كامل
ما يفرط معك شكلو بكون احلى شوفو ما احلاه

بهالمرحلة شعلي الفرن حتى يحمى على حرارة 200 مئوي


هلا بنيجي للهدية المفاجئة>>>يلا عاد انتي وهديتك


عارفين المحمرة اللي بتنباع عند مطعم زيت وزعتر انا عملتلكم اياها
وبصراحة طلعت اطيب من المطعم جربوها وقولوا رأيكم
وهاي هدية للبنات اللي بحبوا الاكل الحار

اول شي بنحتاج شطة حارة وهي اللي بتنعمل من الفلفل الاحمر
انا امي بتعملها وبتبعتلي اياها ما حدا يسألني كيف بتنعمل لاني ما بعرف
ولما امي ما تبعتلي بشتريها من السوق اخر مرة اشتريتها من القرية العالمية
الركن الفلسطيني وهاي صورتها للي ما بيعرفها اتمنى تكون واضحة ومعروفة
بنفرد العجينة اللي بقيت على شكل مستطيل زي كانا بدنا نسوي سينامون
وبندهنها بالشطة الحارة ولا تكتري كتير الشطة حراقة جدا


بنجيب شرايح جبنة وانا بستعمل اما القشقوان واما الشيدر لكن الشيدر لازم يكون النوع
الغامق extra mature وهاي بتكون جهة تلاجة الاجبان بالكيلو يعني تطلبيها من البياع
وهو بيعطيكي اياها وانتبهي ذوقيها الاول لانو في ناس تكره الطعم اللاذع لهاد النوع من الاجبان
الافضل تستعملي القشقوان اغلب الناس بتحبها
بحط الشرايح بهاد الشكل


وبنلف العجين عليها وبعدين بنحط شرايح تاني وبنلف
لحتى تخلص العجينة بتصر مثل الاسطوانة بهالشكل
http://www.raff3.com/uploads/picture/1259b37d22.jpg

بنقسم العجين بالسكين وبنحطها بصينية الخبز


وهلا بندخل الصواني عالفرن من تحت وبنتركها خمس دقايق وبنتفقدها كل شوي
لما تصير ارضية العجين ذهبية بنرفعها عالرف اللي فوق وبنحمرها بالشواية


والنتيجة ولا اروع

هاي الزعتر والجبنة

وهاي البيض مستوي عالاخر لا تخافوا ومحمر ومقمر


وهاي هديتي للحلوين المحمرة مع جبن القشقوان

وهاي كمان صورة عشان اشهيكم ومع كاسة شاي بالنعناع يا سلام وفطور ولا احلى



واتمنى تجربوها
صحتين وعافية عقلوبكم يا حلوين ..