حصرياً لملتقى جامعة الاقصى ....طريقة قلاية بيض ...اعداد الشيف القدير ^^صقر فلسطين^^

كيف حال الاخوة والاخوات والاصحاب بملتقانا العريق ملتقى جامعة الاقصى

اليوم جبت لكم وبشغل خاص مني واجتهاد كامل والله الموضوع كتابة قلمي قصدي كيبوردي يعني مو منقول وحصري وفقط لدى ملتقى جامعة الاقصى جبت طريقة قلاية بيض بالطريقة الفلسطينية الخالصة يعني لا امريكية ولا لبنانية ولا صومالية فلسطينية بحتة وبأيدي وخبرة فلسطينية
اول شيء بنعمله بنحضر المقادير

1.قلاية حديد ما بزبط البلاستيك لانه بسيح من النار

2.زيت زتون او سمنة بلدي او منجرينا اسرائيلي

3.صحن ملح

4.صحن فلفل اسود

5.طنجرة فاضية عدد 2 (مهمة جداً)

6.واهم شيء البيض طبعاً ...ما بلزم الدجاجة بدنا بس بيضة يا بضتين
طبعاً بيضة واحدة لو كنتي بنت او 5 بيضات او اكثر لو كنت شاب



الان طريقة التحضير

اول شيء وركزوا معي كويس وسجلوا الملاحظات لو نسينا اي خطوة راحت كل الطبخة
اول شيء بنجيب القلاية وبنحطها عالنار تسخن وبس تحسوا انه الزيت حمي شوية وديروا بالكم تحطوا ايديكم للفحص اللي حابب يفحص بيده انا مليش دخل هو حر باللي راح يجرى له لكن انا بفضل بس بالنظر او بالقلب من جوا تحس وانتو عارفين قلب المؤمن دليله استخير ربنا بركعتين ولما تتأكد انه الزيت صار شوية كويس بتروح موطي النار ولا اقول اطفوا النار احسن لاني نسيت خطوة.اول شيء قلنا اهم حاجة هي الطنجرة الفاضية وهذه هي السر بكل طبختنا
بنجيب البيض اول شيء لو كانت بيضة او اكثر اول حاجة بنروح للطنجرة رقم واحد وبنطق البيضة والسؤال اللي بطرح نفسه كيف نطق البيضة والطريقة سهلة مو كتير معقدة بس ركزوا فيها منيح
بتجيب البيضة وعلى حفة الطنجرة وخبطة خفيفة ...قلت خبطة خفيفة يعنيي دوبها تنكسر البيضة مو تروح وانت كاسر الطنجرة والبيضة بضربة واحدة لا البيضة ضربة بسيطة بعدها بتفلقها نصفين وبتفرغ البيضة بالطنجرة رقم واحد الان بتروح للطنجرة رقم اثنين لو كان عندنا اكتر من بيضة وبنفس الحركة بنكررها مع الطنجرة اتنين والسر بهذه العملية انه انا بدي اتأكد انه البيضة كويسة مش افقسها فوق البيضة التانية والاقي ديك قاعد بكاكي في نص المقلاة
وهيك بتخرب الطبخة كلها وصارت مع كتير ناس
المهم بعد ما اطق البيض واحطه بالطنجرة رقم واحد بروح بغسل الطنجرة رقم اتنين وبضبها في مكانها لانه ما بدنا نكوم جلي ونعمل قلق بالدار.
الان بروح بشغل الغاز تاني وبنتظر بس يحمى الزيت وبصب خليط البيض فوق الزيت
وببعد شوية لانه مرات بصير يفط من الزيت شغلات غريبة ممكن تحرق الايدين
انا ببعد بس ما ببعد كتير وارجع الاقي المطبخ مولع عشان خاطر ايدي ما تجيها نقطة زيت
المهم بروح بضيف الملح رشة خفيفة كتير يعني دوبها بأطراف صوابعي
وبعدها برش الفلفل الاسود برضو رشة خفيفة وما اتعامل انه اللي قدامي حبشة مش بيضة
بعدها بطفي الغاز وبنتظر شوية ليرد
بجيب الصينية وبحط القلاية فيها وما تفرغها بصحن لانه نكهة الزيت بتروح من البيضة
وجنبها بحط صحن زعتر وصحن زيت وصحن زتون وكاسة شاي وبحمص رغيفين خبز يا على طنجرة الكهربا يا على الغاز وانا بفضل الغاز لانه اشي بلدي وطبيعي
ويفضل ان تقدم البيضة ساخنة
وبالهنا والشفا وما تنسونا من الدعاء
والله الطريقة حصرية جداً ومجربة على ايدي اكبر الشيفات بغزة صقر فلسطين
لا راح تلاقوها لا بلايت هاوس ولا ديرة ولا حتى روتس ولا الكريزي ووتر اللي انحرق لانه واحد منهم قلى بيضة وما عمل بطريقتي
وتحياتي للجميع

اهلا وسهلا اختي عاشقة الجنان وان شاء الله دوم هالضحكة وغير هيك هو راح يطول بالطبخة بس راح يوخد شي مستاهل ...شيء تاني انا مستغرب منه كيف شميتي ريحة الطبخة وانا مش شابك المايك !! غريبة

يسلمو عالحضور جميعاً

باكو

تطبش بالمجادلة بلاش اعمل منك سماعة كمبويتر

انتي ربنا اصطفاكي من بين عباده وتعلمتي كيف تقلي بيض

غيرك ما بعرف ولهيك احنا موجودين لنعلمهم

والله بيني وبينك انا قاعد بكتب وبحضر لوصفة عمل خروف
ان شاء الله بالمعاد هذا السنة بعد اللي جاية بحطها هون وانا حاليا بحاول اقترح على احمد حمدان يفتح يقسم اسمه وصفة صقر فلسطين لعمل خروف محشي
بس بالنسبة لماما فهي بالفعل بتطلب مني كتير شغلات بالمطبخ من ضمنها على ما اذكر اني اعبي كاسة مية واني اغسل تفاحة واني اطفي الضو
وانا هذا بعتقد انه شغل احترافي صح ولا لا ^_^

تحياتي هلولة منورة

حد يشرح لي الجملة السابقة !!!!!!!

بعرف اعمل بيض بس بحرقه

كيف بتعرفي تعمليه وبتحرقيه بنفس الوقت

لازم يتأخر معاد الوصفة طبعاً لانه الشغلة بدها حرفنة والتحرفن بوخد وقت كتييييييييييييير

شيء تاني انا واثق انه القسم اللي راح يفتحه احمد انا متأكد انه راح يكون انجح قسم مر على تاريخ المنتديات بصورة عامة لانه اللي انعمل القسم بسببه هو انا مو اي حدا تاني وهنا يكمن سر النجاح في أي امر مثل هذا ^_^
بعدين انا ماشي على نظام يا هلولة اخدم اخوك بنفسك يعني اخوية الحمد لله مريحني بجيب لي مية وبعملي شاي وبشتري لي من الدكانة وبالمقابل انا بصلح له كمبيوتره لو صار فيه شيء
تبادلة منفعة

هو بيني وبينك انا المستفيد من تبادل المنفعة مع اخوية والسبب الرئيسي في استفادتي انه اخوية ما عنده كمبيوتر اصلحه ^_^

هو بسترجي ^_^

اخوه صقر فلسطين مش حيا الله يعني بكون الكسبان لو ناولني ^_^

غير هيك هو مضاني على شيكات انه في حال جاب كميوتر وخرب انا اصلحه ليه

بالموسم الجاي ان شاء الله

سر نجاحي باتفقاتي ^_^